Jizzax viloyati Sharof Rashidov tumanida Senatning Sud-huquq masalalari va korrupsiyaga qarshi kurashish qoʻmitasi raisi Abdulhakim Eshmuratov boshchiligidagi ishchi guruh tomonidan 2025-yil 20-may kuni mazkur tumanda oʻtkazilgan Korrupsiyaga qarshi kurashish milliy kengashi yigʻilishida belgilangan vazifalar ijrosi oʻrganildi.

Oʻrganishlar doirasida tuman mahallalarida xavfsiz muhitni shakllantirish, kriminogen vaziyatni barqarorlashtirish, ijtimoiy profilaktika tizimini kuchaytirish hamda korrupsiyaga, jumladan, maishiy korrupsiyaga qarshi kurashish borasida amalga oshirilayotgan ishlar holati tahlil qilindi.

Shuningdek, huquqni muhofaza qiluvchi organlar, mutasaddi tashkilotlar, “mahalla yettiligi” vakillari, mahalla faollari hamda jamoatchilik ishtirokida joylarda erishilgan natijalar va mavjud kamchiliklar muhokama qilindi.

Ishchi guruh aʼzolari tumandagi “Togʻchilik” mahallasida boʻlib, profilaktik chora-tadbirlar samaradorligini oshirish, aholi bilan yaqin muloqotni kuchaytirish, jinoyatchilikka sabab boʻlayotgan omillarni bartaraf etish, davlat xizmatlarini koʻrsatishda ochiqlik va shaffoflikni taʼminlash, shuningdek, maishiy korrupsiya holatlarining oldini olish masalalariga alohida eʼtibor qaratdi.

Oʻrganishlar yakunida mahallalarda jinoyatchilikning oldini olish, uni keltirib chiqarayotgan shart-sharoitlarni bartaraf etish, maishiy korrupsiya holatlarining oldini olish hamda tadbirkorlar uchun qulay ishbilarmonlik muhitini yaratishga qaratilgan tegishli taklif va tavsiyalar berildi.