Sirdaryo viloyatida Davlat xavfsizlik xizmati xodimlari tomonidan Prokuratura organlari va Sudyalar oliy kengashi bilan hamkorlikda oʻtkazilgan tezkor tadbirda yirik miqdordagi pora bilan bogʻliq jinoyatga chek qoʻyildi. Bu haqda DXX matbuot xizmati xabar bermoqda.

Maʼlum boʻlishicha, Sirdaryo viloyat sudining iqtisodiy ishlar boʻyicha sudlov hayʼati sudyasi oʻzining ish yurituvida boʻlgan daʼvo ishini ijobiy hal qilib berish evaziga tadbirkordan pul talab qilgan. Gap mahalliy tadbirkor tomonidan Guliston shahrida qurilgan koʻp qavatli bino boʻyicha kassatsiya tartibida koʻrilayotgan daʼvo ishi haqida bormoqda.

Sudya mazkur ish qonunan tadbirkor foydasiga hal boʻlishini oldindan bilgan boʻlsa-da, “Agrobank” ATB Guliston filialining mansabdor xodimi (oʻzining yaqin aloqasi) orqali tadbirkordan 7500 AQSH dollari talab qilgan.

Oʻtkazilgan tezkor tadbir davomida bank mansabdori soʻralgan puldan 5500 AQSH dollarini vositachi sifatida qabul qilib olgan. Sud tomonidan tadbirkor foydasiga qaror eʼlon qilinganidan soʻng, bank xodimi sudyaga 3600 AQSH dollarini berayotgan vaqtida ashyoviy dalillar bilan ushlangan.

Hozirda mazkur holat yuzasidan ushbu shaxslarga nisbatan jinoyat ishi qoʻzgʻatilib, dastlabki tergov harakatlari olib borilmoqda.

Eslatma: DXX fuqarolardan shu kabi korrupsion holatlarga duch kelganda 1520 qisqa raqamiga xabar berishni soʻraydi. Maʼlumot bergan shaxslarning sir saqlanishi toʻliq kafolatlanadi.