Navoiy viloyati hokimi Normat Tursunov “The Investor” xalqaro jurnalining bosh muharriri Leandro Slovinski bilan Zoom platformasi orqali muloqot oʻtkazdi.

Muloqotda Navoiy viloyatining iqtisodiy rivojlanishi, ijtimoiy sohadagi oʻzgarishlar hamda yashil energetika yoʻnalishida amalga oshirilayotgan loyihalar haqida atroflicha soʻz yuritildi.

Shuningdek, Navoiy viloyatidagi keng koʻlamli oʻzgarishlar, investorlar uchun sharoit va imkoniyatlar hamda infratuzilmaning rivoji, hududning investitsion jozibadorligi alohida taʼkidlandi.

Leandro Slovinski oʻz faoliyati davomida koʻplab davlat rahbarlari, vazirlar va yirik kompaniyalar rahbarlari bilan intervyular oʻtkazgan tajribali jurnalist sifatida Navoiy viloyatining bugungi taraqqiyotidan mamnunligini eʼtirof etdi.

Muloqot yakunida viloyatning investitsion imkoniyatlarini xalqaro miqyosda keng targʻib qilish va hamkorlikni yanada rivojlantirish masalalari yuzasidan fikr almashildi.

Maʼlumot oʻrnida taʼkidlash joiz, “The Investor” jurnali dunyoning 48 mamlakatida tarqatilib, 80 mingdan ortiq nusxada chop etiladi. Raqamli varianti esa bir milliondan ortiq kishining eʼtiborini jalb etadi.

Temur ESHBOYEV, “Xalq soʻzi”.