Fors koʻrfazi va Yevropa mamlakatlarining bir qator yetakchilari AQSH va Eron oʻrtasidagi mojaroni tartibga solish boʻyicha kelishuvlarga erishish uchun taxminan yarim yil vaqt kerak boʻlishi mumkin deb hisoblashadi. Bu haqda Bloomberg agentligi xabar bermoqda.

Agentlikning yozishicha, vaziyatdan xabardor mulozimlar Fors koʻrfazi va Yevropa mamlakatlarining ayrim rahbarlari AQSH va Eron oʻrtasidagi tinchlik bitimini muvofiqlashtirish uchun qariyb olti oy vaqt kerak boʻladi, deb oʻylashayotganini va tomonlar ushbu muddatga mos kelishi uchun oʻt ochishni toʻxtatish rejimini uzaytirishi kerakligini bildirgan.

Bloomberg maʼlumotlariga koʻra, mamlakat rahbarlari energetika resurslari yetkazib berishni tiklash uchun Hoʻrmuz boʻgʻozidagi blokadani zudlik bilan olib tashlashni istashmoqda. Agar may oyigacha vaziyat normallashmasa, bu global oziq-ovqat inqirozi va energetika resurslari narxining yanada oshishiga olib kelishi mumkin.

Fors koʻrfazi davlatlarida Eron yadro quroliga ega boʻlishni istayotganiga va AQSH hamda Isroilning zarbalari bu intilishni oʻzgartirmaganiga ishonishadi. Ehtimoliy tinchlik bitimi Islom Respublikasiga uranni boyitishni va uzoq masofaga uchuvchi ballistik raketalarga ega boʻlishni taqiqlashi kerak.

Shu bilan birga, Fors koʻrfazi davlatlari yetakchilari harbiy harakatlarning qayta boshlanishini istamaydilar va Tehron bilan muzokaralar oʻtkazish tarafdoridirlar.