AQSH Prezidenti Donald Tramp maʼmuriyati Eronga qarshi operatsiya vaqtida yordam bermagan NATO mamlakatlaridan oʻz qoʻshinlarini olib chiqib ketish imkoniyatini koʻrib chiqmoqda. Bu haqda The Wall Street Journal xabar bermoqda.

Rejaga muvofiq, Amerika qoʻshinlari Vashingtonning harbiy kampaniyasini faolroq qoʻllab-quvvatlagan davlatlarga koʻchiriladi.

Shu tariqa Qoʻshma Shtatlar Yevropadagi NATO davlatlarini nizoda yordam berishdan bosh tortgani uchun jazolamoqchi. Shu bilan birga, ushbu taklif Trampning AQSHni NATOdan toʻliq chiqarib yuborish haqidagi tahdididan farq qiladi.

Qoʻshinlarni qayta joylashtirishdan tashqari, reja Yevropa mamlakatlaridan kamida bittasidagi AQSH bazasini yopishni ham oʻz ichiga olishi mumkin.

Taʼkidlanishicha, ushbu reja maʼmuriyatning yuqori lavozimli mulozimlari orasida qoʻllab-quvvatlangan, biroq hozirda ishlab chiqishning dastlabki bosqichida turibdi.

WSJ nashrining yozishicha, Amerika qoʻshinlarining qayta joylashtirilishidan Polsha, Ruminiya, Litva va Gretsiya foyda koʻrishi mumkin. AQSHning ushbu rejasi koʻproq miqdordagi Amerika qoʻshinlarining Rossiyaning gʻarbiy chegaralariga yaqinroq joylashishiga olib kelishi mumkin.