Qozogʻiston parlamenti delegatsiyasining Oʻzbekistonga tashrifi doirasida Samarqand shahri “Ipak yoʻli” turizm va madaniy meros xalqaro universitetida “Umumiy oʻtmishdan – mushtarak kelajak sari” mavzusida Oʻzbek-qozoq ilmiy-ijodiy ziyolilarining ikkinchi forumi boʻlib oʻtdi.

Forumning ochilish marosimida Oliy Majlis Senati Raisi Tanzila Narbayeva soʻzga chiqib, Oʻzbekiston va Qozogʻiston xalqlari ildizi mushtarak, taqdiri tutash, Buyuk Ipak yoʻli chorrahasida ming yillar davomida shakllangan boy meros sohiblari ekanini alohida taʼkidladi.

Qayd etilganidek, ikki mamlakat oʻrtasidagi munosabatlar bugungi kunda davlat rahbarlarining siyosiy irodasi va birgalikdagi saʼy-harakatlari tufayli yangi mazmun bilan boyib bormoqda.

Qozogʻiston Senati Raisi Maulen Ashimbayev ikki davlat oʻrtasidagi parlamentlararo hamkorlik iqtisodiyot va siyosatdan tortib, ekologiya, taʼlim va madaniyatgacha boʻlgan asosiy yoʻnalishlarni qamrab olgan holda bundan buyon ham izchil kengayib borishini taʼkidladi.

Forumda Abu Ali ibn Sino, Abu Rayhon Beruniy, al-Forobiy, Mahmud Qoshgʻariy, Alisher Navoiy, Bobur va Abay kabi ulugʻ siymolar merosi xalqlarimiz oʻrtasidagi maʼnaviy yaqinlikning mustahkam asosi ekani alohida qayd etildi. Samarqand, Buxoro, Xiva, Toshkent, Turkiston, Chimkent va Olmaota kabi shaharlar esa umumiy tarix va madaniy merosning tirik guvohlari sifatida eʼtirof etildi.

Anjumanda keyingi yillarda ikki davlat oʻrtasida gumanitar sohadagi aloqalar sezilarli darajada faollashgani taʼkidlandi. Xususan, oʻtgan yilning oʻzida Oʻzbekiston madaniyati va oʻzbek xalqining koʻp asrlik anʼanalarini targʻib qilishga qaratilgan 18 ta madaniy-gumanitar tadbir oʻtkazilgani qayd etildi.

Qozogʻiston vakillari Samarqanddagi “Sharq taronalari”, Shahrisabzdagi “Maqom”, Termizdagi “Baxshi”, Margʻilondagi “Buyuk ipak yoʻli” va Qoʻqondagi “Hunarmand” kabi xalqaro festivallarda muntazam ishtirok etib kelayotgani alohida eʼtirof etildi.

Ilm-fan va taʼlim sohasidagi hamkorlik natijalari forum ishtirokchilari eʼtibor markazida boʻldi. Bugungi kunda Qozogʻistondagi 116 ta taʼlim muassasasida 8 500 nafar oʻzbekistonlik talaba tahsil olayotgani, universitetlar, fanlar akademiyalari, muzeylar va ijodiy uyushmalar oʻrtasida samarali hamkorlik shakllangani taʼkidlandi.

Shu tariqa, Samarqandda boʻlib oʻtgan Oʻzbek-qozoq ilmiy-ijodiy ziyolilarining ikkinchi forumi ikki xalq oʻrtasidagi gumanitar aloqalarni yanada mustahkamlash, yangi qoʻshma tashabbus va loyihalarni muhokama qilish, shuningdek, ilm-fan, madaniyat va ijod ahli oʻrtasida oʻzaro fikr almashish uchun muhim maydon boʻlib xizmat qildi.

Shu bilan birga, forum doirasida delegatsiya rahbarlari va ishtirokchilar universitetda tashkil etilgan ikki xalqning buyuk shoirlari, rassomlari va olimlarining ilmiy hamda ijodiy merosidan iborat namunalar koʻrgazmasi, shuningdek, innovatsiyalar va IT-texnologiya loyihalari bilan tanishdilar.