Tumanning Qoʻlbosti mahallasidagi “SAG-Agro” masʼuliyati cheklangan jamiyatiga qarashli 550 gektarlik intensiv yongʻoqzorda birinchi hosilni yigʻishtirish ishlari boshlanish arafasida, - deb xabar bermoqda Jomboy tumani hokimligi axborot xizmati.

Bu yil aprel oyidagi noqulay ob-havo sharoiti mahalliy yongʻoqlarga salbiy taʼsir koʻrsatdi. Daraxtlarning 70-80 foizida guli toʻkildi. Ammo bundan intensiv yongʻoqzor zarar koʻrgani yoʻq. Chunki chandler yongʻoqlari may oyida gullaydi. Erta bahorda kutiladigan sovuqlar unga ziyon qilmaydi. Bu ham intensiv bogʻdorchilikning oʻziga xos yutugʻi.

— Yongʻoqzor kelgusi yildan toʻliq hosilga kiradi, — deydi jamiyat rahbari Fariddun Roziqov. — Oktyabr oyida yigʻishtiriladigan nishona hosil laborator tekshiruviga olinadi. Namuna sifatida chet el mutaxassislariga ham koʻrsatamiz. Hozircha, uch-toʻrt yillik yosh daraxtlarning rivojlanishi, hosil berishi belgilangan talabga mos kelyapti. 2021-yilda AQSH, Rossiya, Germaniya va boshqa mamlakatlarga mahsulot yetkazib beriladi. Bu esa tuman iqtisodiyoti, qishloq xoʻjaligi uchun juda muhim.

Abdulaziz Yoʻldoshev
(Xalq soʻzi)