Foto: Videodan kadr

Jizzax viloyati Baxmal tumanida “Cobalt” katta tezlikda voyaga yetmagan ikki qizni urib yubordi. Bu haqda viloyat YHXB axborot xizmati xabar berdi.

Qayd etilishicha, voqea joriy yilning 18-noyabr kuni soat 19:30 larda Baxmal tumani hududidan oʻtgan “Gʻallaorol — Baxmal — Supa-Zomin” 4R-41 yoʻlining 29 kilometrida sodir boʻlgan.

Oʻsha kuni 1991-yilda tugʻilgan A.O “Cobalt” avtomobilini Oʻsmat yoʻnalishi boʻyicha boshqarib kelayotib, yoʻlning belgilangan joyidan kesib oʻtayotgan voyaga yetmagan ikki piyoda: 2011-yilda tugʻilgan I.M. va uning singlisi, 2020-yilda tugʻilgan I.K.ni urib yuborgan.

Oqibatda opa-singil turli tan jarohatlari olib voqea joyida vafot etgan.

Mazkur holat yuzasidan shu kunning oʻzida Jizzax viloyati IIB huzuridagi Tergov boshqarmasi tomonidan gumonlanuvchi O.A.ga nisbatan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 3-qismi “a” bandi va 117-modda (xavf ostida qoldirish) 3-qismi “a” bandi bilan jinoyat ishi qoʻzgʻatilib ushlangan va vaqtincha saqlash hibsxonaga joylashtirilgan.

Hozirda dastlabki tergov harakatlari olib borilmoqda.