Foto: Xalq so‘zi

Davlat xizmatini rivojlantirish agentligi Jizzax filialida oʻtkazilgan yoshlar bilan uchrashuvda konstitutsiyaviy islohotlarning zarurati va mohiyati xususida atroflicha soʻz yuritildi. Taʼkidlanganidek, bugun yurtimiz ijtimoiy-siyosiy hayotidagi qizgʻin jarayonga yoshlarimizning befarq emasligi, oʻzgarish va yangilanishlarga daxldorlik hissi bilan yondashuv koʻnikmasi shakllanib borayotgani alohida eʼtirofga loyiqdir.

— Mamlakatimiz ertasi boʻlgan yoshlarni har tomonlama qoʻllab-quvvatlash, bilimli, yetuk, salohiyatli inson sifatida kamol topishi uchun koʻmaklashish, huquq va erkinliklarini himoya qilishning tashkiliy-huquqiy asoslari takomillashtirilayotgani ayni muddaodir, — deydi Jizzax viloyat “Kelajak liderlari” klubi prezidenti Dilshod Mirzayev. — Davlat xizmatini rivojlantirish agentligi Jizzax filialida yoshlarga “Oʻzbekiston Respublikasi Konstitutsiyasiga oʻzgartirish va qoʻshimchalar kiritish toʻgʻrisida”gi Konstitutsiyaviy qonun loyihasi mazmun-mohiyati mutaxassislar tomonidan chuqur tushuntirib berildi.

Tadbirda Qonun loyihasining 65-moddasi, 93-moddasi va 105-moddasiga kiritilayotgan oʻzgarish va qoʻshimchalar yoshlarda koʻproq qiziqish uygʻotdi. Ular mutaxassislardan oʻzlarini qiziqtirgan savollarga javob oldilar.

Tolibjon ERGASHEV, “Xalq soʻzi”.