AQSH Prezidenti Donald Tramp agar muzokaralar muvaffaqiyatsiz yakunlansa, Vashington Eronga zarba berishni qayta boshlashini maʼlum qildi. Bu haqda u New York Post nashriga bergan intervyusida aytib oʻtdi.

“Bizda “qayta yuklash” jarayoni ketmoqda. Biz kemalarimizni eng yaxshi oʻq-dorilar va tarixdagi eng yaxshi qurollar bilan toʻldirmoqdamiz — ular avval ularni yakson qilganimizda ishlatganlarimizdan ham yaxshiroq. Agar kelishuvga erisha olmasak, biz ularni juda samarali tarzda qoʻllaymiz”, — deb taʼkidladi Amerika yetakchisi.

AQSH va Eron muzokaralari 11-aprel kuni Islomobodda (Pokistonda) boʻlib oʻtadi. Ular Toshkent vaqti bilan soat 17:00 dan keyin boshlanadi.

Amerika delegatsiyasiga AQSH vitse-prezidenti Jey Di Vens rahbarlik qilmoqda. Delegatsiya tarkibidan prezident Donald Trampning maxsus vakili Stiv Uitkoff va uning kuyovi Jared Kushner oʻrin olgan. Delegatsiya Islomoboddagi aviabazaga AQSH Harbiy-havo kuchlarining ikkita samolyotida kelib qoʻndi.

Parlament spikeri Muhammad-Baqir Qolibof va Tashqi ishlar vaziri Abbos Araqchi boshchiligidagi Eron delegatsiyasi esa biroz avvalroq yetib kelgan edi.