АҚШ Президенти Дональд Трамп агар музокаралар муваффақиятсиз якунланса, Вашингтон Эронга зарба беришни қайта бошлашини маълум қилди. Бу ҳақда у New York Post нашрига берган интервьюсида айтиб ўтди.

«Бизда «қайта юклаш» жараёни кетмоқда. Биз кемаларимизни энг яхши ўқ-дорилар ва тарихдаги энг яхши қуроллар билан тўлдирмоқдамиз — улар аввал уларни яксон қилганимизда ишлатганларимиздан ҳам яхшироқ. Агар келишувга эриша олмасак, биз уларни жуда самарали тарзда қўллаймиз», — деб таъкидлади Америка етакчиси.

АҚШ ва Эрон музокаралари 11 апрель куни Исломободда (Покистонда) бўлиб ўтади. Улар Тошкент вақти билан соат 17:00 дан кейин бошланади.

Америка делегациясига АҚШ вице-президенти Жей Ди Вэнс раҳбарлик қилмоқда. Делегация таркибидан президент Дональд Трампнинг махсус вакили Стив Уиткофф ва унинг куёви Жаред Кушнер ўрин олган. Делегация Исломободдаги авиабазага АҚШ Ҳарбий-ҳаво кучларининг иккита самолётида келиб қўнди.

Парламент спикери Муҳаммад-Бақир Қолибоф ва Ташқи ишлар вазири Аббос Арақчи бошчилигидаги Эрон делегацияси эса бироз аввалроқ етиб келган эди.