“Telegram”da yangi platforma ishga tushirildi
Foto: Keystone Press Agency
“Telegram” messenjeri reklama platformasini ishga tushirdi. Bu haqda kompaniya tomonidan maʼlum qilindi.
Taʼkidlashicha, messenjer reklamalari 1000 dan ortiq obunachiga ega boʻlgan yirik ommaviy kanallarda ishlaydi. Reklama matnida koʻpi bilan 160 ta belgi boʻlishi lozim.
Shuningdek, reklamalar mazmuni faqat ular koʻrsatiladigan kanallar mavzulariga asoslanadi. Bu shuni anglatadiki, “Telegram” kanaliga tashrif buyurgan har bir kishiga bir xil xabar koʻrsatiladi. Shu bilan birga, foydalanuvchi maʼlumotlari tahlil qilinmaydi.
Avvalroq “Telegram” asoschisi Pavel Durov messenjerda reklama xabarlarini joylashtirish mexanizmini haqida gapirgan edi. Uning taʼkidlashicha, ilova foydalanuvchilarining aksariyati yangilikni deyarli sezmaydilar.
Durovning soʻzlariga koʻra, “Telegram”dagi chatlar, shaxsiy suhbatlar yoki guruhlarda reklama koʻrsatilmaydi. Shuningdek, reklamalarni koʻrsatishda shaxsiy maʼlumotlardan foydalanilmaydi. Chunki kompaniya uchun foydalanuvchi maxfiyligi birinchi oʻrinda turadi.
Izohlar
Hozircha hech kim fikr bildirmagan. Balki Siz birinchilardan bo'larsiz?
Izoh qoldirish uchun tizimga kiring