Mutaxassislar tadbirkor kapitalining keskin kamayishini texnologik sektordagi umumiy pasayish va Telegram qiymatining qayta baholanishi bilan izohlamoqdalar. Ekspertlar messenjer qiymatini hisoblashda uning toʻgʻridan-toʻgʻri raqobatchisi — Amerikaning SnapChat platformasi koʻrsatkichlaridan foydalanishgan.

Telegram auditoriyasi 1 milliard foydalanuvchidan oshganiga qaramay, kompaniyaning moliyaviy natijalari bosim ostida qolmoqda. Yillik tushum 2 milliard dollar miqdorida boʻlishi prognoz qilinyapti, shu bilan birga, oʻtgan yilning faqat birinchi yarmida sof zarar 222 million dollarni tashkil etgan.

Qarz majburiyatlari qoʻshimcha moliyaviy yukka aylandi. 2026-yil 22-martga qadar Pavel Durov obligatsiya egalariga qariyb 1,1 milliard dollar toʻlashi kerak. Avvalroq qarzlarning bir qismini yopish uchun 1,7 milliard dollarlik yangi qimmatli qogʻozlar 9 foizli daromad stavkasi bilan joylashtirilgan edi, bu esa investorlar uchun xavf (risk) ortganidan dalolat beradi.

Tahlilchilarning fikricha, yaqin istiqbolda kompaniya aksiyalarini birlamchi ommaviy joylashtirish (IPO) oʻtkazish ehtimoli past. Bu servisning Rossiya va Eron kabi asosiy bozorlarda bloklanishi, shuningdek, kompaniyaning hozirgi bozor qiymati rahbariyat kutganidan ancha past boʻlib chiqqani bilan bogʻliq.