Svetofor samaradormi yoki 30 km/soatlik cheklov yoʻl belgisi?

13:08 27 Dekabr 2022 Jamiyat
824 0

Foto: Xalq so‘zi

Xalq deputatlari Navoiy viloyati Kengashining navbatdan tashqari sessiyasida dolzarb masalalar qatorida hududda jamoat xavfsizligini taʼminlash, avtomobil yoʻllarida inson hayoti va sogʻligʻini yoʻl-transport hodisalaridan kafolatli himoya qilish hamda yoʻl harakati xavfsizligini taʼminlash borasida amalga oshirilayotgan ishlar hamda mavjud muammolar toʻgʻrisidagi masala muhokama qilindi. Masala yuzasidan viloyat IIB boshligʻi oʻrinbosari Umidjon Adizovning joriy yil 11 oyi yakunlari boʻyicha hisobot tinglandi.

Taʼkidlanishicha, hisobot davrida viloyatdagi mahallalarning 43 foizida yoʻl-transport hodisalari bilan bogʻliq birorta ham jinoyat qayd etilmagan. Biroq Xatirchi tumanidagi 24 ta MFY bu borada “qizil” toifada turibdi. Hisobotda yoʻl-transport hodisalari oqibatida vafot etish holatlari tahlil etilar ekan, bu oʻtgan yilning mos davriga nisbatan qariyb 15 foizga kamaygani, ularning aksariyati tezlikni oshirish, 8 tasi esa transport vositasini mast holatda boshqarish sababli sodir boʻlganligi qayd etildi.

Oʻquvchilarning maktabga qatnovida ularning xavfsizligini taʼminlash boʻyicha amalga oshirilayotgan chora-tadbirlarga toʻxtalib, maʼruzachi qirqta umumtaʼlim maktablari joylashgan hudud koʻchalariga harakat tezligini 30 km/soatga cheklovchi yoʻl belgilari oʻrnatilgani, 10 ta nuqtada esa piyodalar tomonidan boshqariladigan yarim avtomat svetoforlar oʻrnatilganini taʼkidladi.

Muzokarada deputatlar aksariyat holatlarda tezlikni cheklashga haydovchilar rioya etishmayotganini, qolaversa, bu turli tirbandliklar (ayniqsa xalqaro ahamiyatdagi yoʻllarda) tugʻdirayotganini aytib oʻtdilar. Shu sabab piyodalar tomonidan boshqariladigan svetoforlarni koʻpaytirish boʻyicha taklif maʼqullandi.

Sessiyada, shuningdek, viloyatni ijtimoiy-iqtisodiy rivojlantirishning bir qator yoʻnalishlari boʻyicha mutasaddilarning hisobotlari tinglandi.

Temur ESHBOYEV, “Xalq soʻzi”.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?

Yangiliklar taqvimi

Кластер