Guliston tumanidagi Tajribakor mahallasida 5-davlat maktabgacha taʼlim tashkiloti oʻz faoliyatini boshladi.

Loyiha qiymati 4 milliard 220 million soʻmlik ushbu muassasa 150 oʻringa ega. MTTda bolajonlarning sifatli taʼlim-tarbiyasi uchun zarur barcha sharoit yaratilgan, xususan, oʻyin maydonchalari, mashgʻulot xonalari, oshxona, musiqa zallari zamonaviy jihozlangan.

— 2023-yilning yanvar oyi holatiga koʻra, Sirdaryo viloyatida 963 ta maktabgacha taʼlim tashkilotlari faoliyat yuritgan boʻlsa, 2024-yil boshida ularning soni 1 097 taga yetdi, — deydi Sirdaryo viloyati maktab va maktabgacha taʼlim boshqarmasi axborot xizmati rahbari Dilfuza Oʻroqboyeva. — Bunda davlat va davlat-sheriklik asosidagi MTTlar jami 6 taga koʻpaygani holda oilaviy nodavlat maktabgacha taʼlim tashkilotlari soni nisbatan ancha koʻp – 128 taga oshdi. Shunday qilib, joriy yil yanvar oyida viloyatimiz boʻyicha 3-7 yoshdagi bolalarning MTTlardagi taʼlim-tarbiya bilan qamrab olinish darajasi 82,9 foizga yetdi.

Yil yakuniga qadar ushbu koʻrsatkichni 85 foizga yetkazish koʻzda tutilgan.

Ahmadali SHERNAZAROV, “Xalq soʻzi”.