SOF EXPO koʻrgazma maydonida oʻtkazilgan Markaziy Osiyodagi eng yirik taʼlim tadbirida Oʻzbekistondan tashqari Yevropa, Rossiya, Belarus, Turkiya va Qozogʻiston kabi 10 dan ortiq mamlakatlardan yetakchi universitetlar, taʼlim tashkilotlari, konsalting kompaniyalari va oʻquv markazlari ishtirok etdi.

WORLD EDU 2026 abituriyentlar, talabalar va ularning ota-onalari uchun asosiy platforma vazifasini oʻtab, bu yerda ular xalqaro va mahalliy universitetlarga kirish, taʼlim grantlari va stipendiyalari, xalqaro imtihonlar, zamonaviy taʼlim dasturlari boʻyicha eng soʻnggi maʼlumotlarga ega boʻldilar.

— WORLD EDU 2026 xalqaro taʼlim koʻrgazmasining Samarqand shahrida oʻtkazilishi hududning taʼlim va biznes infratuzilmasini rivojlantirishda muhim qadam hisoblanadi, — deydi SOF EXPO Samarqand koʻrgazma majmuasi direktori Ahmad Tojiboyev. — Bugungi kunda sifatli taʼlim va xalqaro hamkorlikka boʻlgan qiziqish barqaror oʻsib bormoqda va bunday tadbirlar talabalar, taʼlim muassasalari hamda professional jamoatchilik oʻrtasidagi hamkorlik uchun muhim platforma vazifasini bajaradi. WORLD EDU nafaqat koʻrgazma, balki tajriba almashish, taʼlim imkoniyatlarini taqdim etish va yangi hamkorliklarni shakllantirish uchun samarali vositadir. Ishonamizki, Samarqandda shunday xalqaro tadbirlarni oʻtkazish shaharning Markaziy Osiyodagi taʼlim va koʻrgazma turizmi markazlaridan biri sifatidagi maqomini yanada mustahkamlaydi.

WORLD EDU barqaror oʻsishni namoyish etmoqda va mintaqaning asosiy taʼlim tadbiri sifatidagi mavqeini mustahkamlamoqda. Xususan, joriy yilda mazkur tadbirga 4000 dan ortiq maqsadli tashrif buyuruvchilar kelishdi.

Koʻrgazma geografiyasining kengayishi va boʻlajak talabalarning qiziqishi ortib borayotgani koʻrgazmaning dolzarbligini va xalqaro taʼlimga boʻlgan talabning ortib borayotganini koʻrsatadi.

WORLD EDU 2026 xalqaro hamkorlik, akademik mobillik va global bozorda talab yuqori boʻlgan yangi avlod mutaxassislarini rivojlantirishga yordam beradi. Shuningdek, koʻrgazma nafaqat taʼlim tanlovi platformasi, balki mintaqada inson kapitalini rivojlantirishning muhim vositasiga aylanib bormoqda.

Abdulaziz YOʻLDOSHEV, “Xalq soʻzi”.