Qashqadaryo viloyati, Kitob tumanida yashovchi 29 yoshli (ayol) S.F. murojaat qilib, oʻzining uyatli foto hamda video tasvirlari nomaʼlum shaxs tomonidan “Telegram” messenjerida tarqatib yuborganligini maʼlum qilgan.

Tezkor-qidiruv xizmati Kiberxavfsizlik boʻlinmalari tomonidan oʻtkazilgan tezkor-qidiruv tadbirlari natijasida, ushbu jinoyatni Toshkent shahri, Chilonzor tumanida yashovchi 17 yoshli Z.S. sodir etganligi aniqlandi.

Unga koʻra, Z.S. “Telegram” messenjerida jabrlanuvchi (ayol) S.F.ning profilidan u joylashtirgan fotosuratlarini yuklab olib, ularga maxsus dasturlardan foydalanib ishlov berib, tarqatib yuborganligi maʼlum boʻldi.

Mazkur holat yuzasidan Oʻzbekiston Respublikasi JKning 141/3-moddasi 2-qismi “v” bandi bilan jinoyat ishi qoʻzgʻatilib, Z.S.ning sodir etilib, fosh etilmay qolgan boshqa shu turdagi jinoyatlarga aloqadorligini tekshirish maqsadida tergov, tezkor-qidiruv harakatlari davom ettirilmoqda.

Qonunga muvofiq, Oʻzbekiston Respublikasi Jinoyat kodeksining 141/3-moddasi 2-qismi “v” bandidagi jinoiy xatti-harakatlar uchun uch yuz oltmish soatdan toʻrt yuz sakson soatgacha majburiy jamoat ishlari yoki bir yildan uch yilgacha ozodlikni cheklash yoxud uch yilgacha ozodlikdan mahrum qilish jazosi nazarda tutilgan.