Qoʻqondagi koʻp qavatli uyda gaz portladi. Bir kishi halok boʻldi
Videodan kadr
Fargʻona viloyati Qoʻqon shahridagi koʻp qavatli uylardan birida gaz portlashi oqibatida bir kishi halok boʻldi. Bu haqda viloyat Favqulodda vaziyatlar boshqarmasi xabar berdi.
Qayd etilishicha, kecha, 16-fevral kuni soat 21:18 da Qoʻqon shahar “Muqimiy” koʻchasidagi koʻp qavatli uyda yongʻin boʻlayotgani toʻgʻrisida 112 tizimi orqali viloyat FVBga xabar tushgan. Voqea joyiga yongʻin-qutqaruv ekipajlari soat 21:23 da yetib borib, 21:25 da alangani oʻrab olgan va 21:32 da batamom oʻchirgan.
Maʼlum boʻlishicha, yongʻin gaz va havo aralashmasining chaqnashi oqibatida yuzaga kelgan boʻlib, 28-uyning 50 kvadrat metr maydonda tom va shift qismi hamda uy jihozlari yongan.
Chaqnash oqibatida 4 nafar fuqaro turli darajada kuyish tan jarohatlari olib, shahar tibbiyot birlashmasiga yotqizilgan. Koʻrsatilgan tibbiy yordamga qaramasdan 1 nafar fuqaro vafot etgan.
FVBga koʻra, hozirda hodisaning sabablari aniqlanmoqda.
Izohlar
Hozircha hech kim fikr bildirmagan. Balki Siz birinchilardan bo'larsiz?
Izoh qoldirish uchun tizimga kiring