Foto: Xalq so‘zi

Prezidentimizning 2022-yil 4-avgustdagi “Oilaviy bolalar uylari faoliyatini takomillashtirishga oid qoʻshimcha chora-tadbirlar toʻgʻrisida”gi qarori asosida Qashqadaryo viloyatida 18 ta oilaviy bolalar uyi tashkil etilib, ayni paytda ularda 109 nafar oʻgʻil-qiz kamolga yetmoqda.

Qarshi shahrida oilaviy bolalar uylari rahbarlari va oʻz xonadonida shunday muassasa ochish istagida boʻlgan ota-onalar uchun oʻquv kurslari tashkil etildi. Mashgʻulotlar Jamoat xavfsizligi universiteti oʻqituvchilari tomonidan olib borildi.

— Balogʻat yoshidagi oʻgʻil-qizni tarbiyalash oson yumush emas, buning uchun ota-ona katta hayotiy tajriba va psixologik koʻnikmaga, zamonaviy qarash va bilimlarga ega boʻlishi lozim, — deydi Qamashi tumanidagi oilaviy bolalar uyi rahbari Saodat Hamidova. — Shu jihatdan oʻquv kurslarining tashkil etilgani biz uchun juda foydali boʻldi. Ayniqsa, ota-onalar va oʻqituvchilar oʻrtasidagi qiziqarli savol-javoblar, hayotiy misollar va qadimiy rivoyatlardan foydalangan holda mashgʻulotlar olib borilgani bizga juda yoqdi.

Oʻz bilim va malakalarini oshirgan oilaviy bolalar uylari rahbarlari va ota-onalarga Qashqadaryo viloyati hokimligi va Oʻzbekiston Milliy gvardiyasi rahbariyati tomonidan sertifikatlar topshirildi.

Faxriddin BOZOROV, “Xalq soʻzi”.