Фото: Халқ сўзи

Президентимизнинг 2022 йил 4 августдаги «Оилавий болалар уйлари фаолиятини такомиллаштиришга оид қўшимча чора-тадбирлар тўғрисида»ги қарори асосида Қашқадарё вилоятида 18 та оилавий болалар уйи ташкил этилиб, айни пайтда уларда 109 нафар ўғил-қиз камолга етмоқда.

Қарши шаҳрида оилавий болалар уйлари раҳбарлари ва ўз хонадонида шундай муассаса очиш истагида бўлган ота-оналар учун ўқув курслари ташкил этилди. Машғулотлар Жамоат хавфсизлиги университети ўқитувчилари томонидан олиб борилди.

— Балоғат ёшидаги ўғил-қизни тарбиялаш осон юмуш эмас, бунинг учун ота-она катта ҳаётий тажриба ва психологик кўникмага, замонавий қараш ва билимларга эга бўлиши лозим, — дейди Қамаши туманидаги оилавий болалар уйи раҳбари Саодат Ҳамидова. — Шу жиҳатдан ўқув курсларининг ташкил этилгани биз учун жуда фойдали бўлди. Айниқса, ота-оналар ва ўқитувчилар ўртасидаги қизиқарли савол-жавоблар, ҳаётий мисоллар ва қадимий ривоятлардан фойдаланган ҳолда машғулотлар олиб борилгани бизга жуда ёқди.

Ўз билим ва малакаларини оширган оилавий болалар уйлари раҳбарлари ва ота-оналарга Қашқадарё вилояти ҳокимлиги ва Ўзбекистон Миллий гвардияси раҳбарияти томонидан сертификатлар топширилди.

Фахриддин БОЗОРОВ, «Халқ сўзи».