Huquqshunos va ishchi guruh aʼzosi Nuriddin Murodov oʻzining telegram kanalida davlatimiz rahbari tomonidan Toshkent shahri va Toshkent viloyatiga doimiy propiska qilish tizimini takomillashtirish boʻyicha qabul qilingan farmoni mazmun-mohiyati haqida batafsil maʼlumot berdi.
Ekspert bu borada qanday oʻzgarishlar boʻlishini quyidagicha izohlab oʻtdi:

— Toshkentdan uy sotib olish uchun propiska talab qilinmaydi;

— Oʻzbekiston Respublikasi fuqarolari tomonidan Toshkent shahridan uy sotib olinganda olganda undiriladigan oshirilgan qiymatdagi davlat boji (mulkning 5 foizi) bekor qilinadi;

— Endilikda propiska huquqiga ega tashkilot va idoralarning tavsiyasi bilan propiskaga ega boʻlgan xodimlar oʻsha idora va tashkilotdagi lavozimidan ketgan taqdirda ham “propiska”si bekor boʻlmaydi;

— Propiska olish uchun er (xotin) nikohdan keyin bir yil davomida birgalikda yashashiga doir talab bekor boʻladi (qonun loyihasi kiritilmoqda);

— Toshkent shahri va viloyatida doimiy roʻyxatda turgan fuqarolar maʼlum muddat boshqa hududda yashab, Toshkent shahri va qaytib kelganda shartlarsiz qayta doimiy roʻyxatga olinadi (qonun loyihasi kiritilmoqda);

— Oilaga tarbiyaga olingan (patronat) shaxslar ularning tutingan ota-onasining doimiy yashash joyi boʻyicha roʻyxatga turish huquqini ega boʻladi (qonun loyihasi kiritilmoqda);

— 2020-yil 1-sentyabrdan Toshkent shahri va Toshkent viloyatida, 2021-yil 1-sentyabrdan boshlab esa, Qoraqalpogʻiston Respublikasi va boshqa viloyatlarda ham “Yagona darcha” tamoyili asosida DXA boʻlimlari tomonidan propiskaga qoʻyish tizimi joriy etiladi;

— Roʻyxatga olish fuqaroning xohishiga koʻra ichki ishlar organlari, davlat xizmatlari markazlari yoki Yagona interaktiv davlat xizmatlari portali orqali bir kun ichida amalga oshiriladi.

— Toshkent shahri va viloyatida doimiy va vaqtincha roʻyxatdan oʻtmasdan yashash muddati 10 kundan 15 kunga uzaytirildi;

— Doimiy roʻyxatni rasmiylashtirishda pasport, uy daftari yoki xonadon kartochkasiga shtamp bosish amaliyotidan voz kechiladi;

— Harbiy xizmatga majburlarning doimiy roʻyxatga olishni rasmiylashtirish, roʻyxatdan chiqish idoralararo elektron dastur orqali amalga oshiriladi;

— Yangi tugʻilgan chaqaloqlar FHDYO organining oʻzida tugʻilish haqidagi guvohnoma berish jarayonida otasi yoki onasining yashash manzili boʻyicha doimiy propiska ega boʻladi;

— Toshkent shahri va viloyatida joylashgan davlat idoralarida 5 yil uzluksiz ishlagan xodim va mutaxassislar doimiy roʻyxatga olinadi;

— Uy-joy sotib olmagan fuqarolar notarial idoralarga murojaat qilganda ulardan propiska talab qilinmaydi;

— Farmondagi vazifalar ijrosi borasidagi qonun loyihasi yaqin kunlarda Oʻzbekiston Respublikasi Oliy Majlis Qonunchilik palatasiga kiritiladi;

— Qonun loyihasi bilan kiritilishi koʻzlangan asosiy oʻzgarishlar “Toshkent shahri va Toshkent viloyatida doimiy propiska qilinishi lozim boʻlgan shaxslar — Oʻzbekiston Respublikasi fuqarolari toifalarining roʻyxati toʻgʻrisida”gi Oʻzbekiston Respublikasi Qonuniga daxldordir.