Bu haqda AOKAda “Oʻzkimyosanoat” aksiyadorlik jamiyati tomonidan Mahalliylashtirish dasturi doirasida amalga oshirilgan ishlar tahliliga bagʻishlangan matbuot anjumani da maʼlum qilindi.

Respublikamizga kirib kelayotgan kimyoviy mahsulotlar importini qisqartirish hisobiga 2020-yil yakuni boʻyicha 23 turdagi 1 342,8 mlrd soʻmlik mahalliylashtirilgan mahsulotlar ishlab chiqarildi (rejaga nisbatan 139,1 foiz), shundan 22,91 mln. dollarlik mahsulot eksport qilindi.

Mahalliylashtirish dasturi doirasida 17 turdagi mahalliylashtirilgan mahsulot toʻliq mahalliy xom-ashyolar asosida ishlab chiqarildi.

Sanoat kooperatsiyasi doirasida 2020-yilda jami 7 turdagi 592,5 mlrd soʻmlik mahsulotlar ishlab chiqarildi. Jumladan:

— togʻ-kon sanoati uchun – 2,01 ming tonna tiomochevina, 37,1 ming tonna natriy sian tuzi, 5,2 ming tonna modifikatsiyalangan gʻovakli selitra;

— shisha sanoati uchun – 4,7 ming tonna natriy nitrati;

—  lak-buyoq sanoati uchun – 800,0 tonna etilatsetat;

— xalq xoʻjaligi va sanoat suvlarini tozalash sohasi uchun 54,6 tonna uchlamchi natriy fosfati;

— avtomobil sanoati uchun – 417,4 ming dona avtomobil shinalari ishlab chiqarildi va isteʼmolchilarga yetkazildi.

2021-yilda “Oʻzkimyosanoat” AJ korxonalarida 26 turdagi 1 467,1 mlrd soʻmlik mahalliylashtirilgan mahsulotlar ishlab chiqarilishi rejalashtirilgan.