Oʻzbekistonda havo harorati qachondan pasayishi aytildi
Foto: Akmal Muhammadov/“Xalq soʻzi”
Oʻtgan hafta respublika boʻyicha kuzatilgan kuchli issiqdan soʻng, 7-11-iyul kunlari Oʻzbekiston hududi boʻyicha havo harorati asta-sekin pasayishi kutilmoqda, deb xabar bermoqda “Oʻzgidromet” agentligi.
Bildirilishicha, bugun, 7-iyul kuni kunduzi havo harorati 36-41 darajani, 8-9-iyul kunlari 33-38 darajani, 10-11-iyulda esa 31-36 darajani tashkil etadi. Oʻzbekiston janubida ham harorat pasayadi va ish haftasining oxiriga kelib harorat 37-40 darajani tashkil etadi.
Respublika hududining katta qismida yogʻingarchilik kutilmaydi. Faqat Fargʻona vodiysi viloyatlarida, shuningdek togʻ oldi va togʻli hududlarda 9-10-iyul kunlari qisqa muddatli yomgʻir yogʻishi ehtimoli bor.
Respublika boʻyicha baʼzi joylarda shamol tezligi 13-18 m/s gacha kuchayishi, chang-toʻzonlar bilan kuzatilishi mumkin.
Toshkent shahrida havo biroz bulutli, vaqti-vaqti bilan oʻzgaruvchan boʻladi, yogʻingarchilik kutilmaydi. 7-iyul kuni harorat asosan 39-41 daraja, 8-9-iyulda 35-38 daraja, 10-11-iyulda 32-37 daraja boʻladi.
Izohlar
Hozircha hech kim fikr bildirmagan. Balki Siz birinchilardan bo'larsiz?
Izoh qoldirish uchun tizimga kiring