Oʻzbek-qoraqalpoqning
Arxiv surat
Niyati pok, qordek oq,
Ajralmas etu tirnoq,
Ertasi yorugʻ, porloq,
Oʻzbek-qoraqalpoqning.
Yov qoʻpsa musht, xuni bir,
Shodlik, motam kuni bir,
Suv ichar Jayxuni bir,
Oʻzbek-qoraqalpoqning.
Soʻzlashsa, dard, siri bor,
Dashtu dala, qiri bor,
Ibroyim shoiri bor,
Oʻzbek-qoraqalpoqning.
Navoiyni yod bilar,
Berdaqni ustod bilar,
Boshin bir oftob silar,
Oʻzbek-qoraqalpoqning
Birdir doston, ertagi,
Oppoq orzu, tilagi,
Yurt, deb urar yuragi,
Oʻzbek-qoraqalpoqning.
Birdir turkiy navosi,
Asrlarning sadosi,
Bitta yer, suv, havosi,
Oʻzbek-qoraqalpoqning.
Egilmasin qomati,
Kulsin baxt-saodati,
Ogʻzibirlik odati,
Oʻzbek-qoraqalpoqning.
Oʻchmas mehr chirogʻi,
Qaynar koʻngil bulogʻi,
Yashnamoqda Moʻynogʻi,
Oʻzbek-qoraqalpoqning.
Bovurim u, inim u,
Qarindosh, yaqinim u,
Doʻstligi boʻlsin mangu,
Oʻzbek-qoraqalpoqning.
Jahongir SHAROFBOYEV.
Izohlar
Hozircha hech kim fikr bildirmagan. Balki Siz birinchilardan bo'larsiz?
Izoh qoldirish uchun tizimga kiring