Foto: Xalq so‘zi

Fargʻona politexnika institutida Oliy va oʻrta maxsus taʼlim, Innovatsion rivojlanish vazirliklari hamda Oila va xotin-qizlar davlat qoʻmitasi hamkorligida oʻtkazilgan forum olima, ziyoli ayollarning jamiyat hayotidagi ishtirokini yanada faollashtirish masalasiga bagʻishlandi. Unda viloyatdagi oliy taʼlim muassasalarida faoliyat olib borayotgan yuzdan ziyod olima, doktorant opa-singillarimizning, magistrant va talaba-qizlarning ilmiy-amaliy izlanishlari, innovatsion loyihalari natijasi oʻrganildi.

— Keyingi yillarda olimalarimiz tomonidan 156 ta darslik va oʻquv qoʻllanmalari, 73 ta monografiya yaratildi, ilmiy izlanishlar olib borayotgan ayollarimizning xorij jurnallarida ikki mingdan ortiq maqolalari chop etildi,-deydi Fargʻona davlat universiteti rektorining xotin-qizlar masalalari boʻyicha maslahatchisi Baxtixon Qurbonova. — Bu oʻquv yurtimizda salohiyatli opa-singillarimiz va qizlarimiz ilmiy faoliyat bilan shugʻullanishi uchun har tomonlama qoʻllab-quvvatlanayotganidan dalolat beradi.

Forum yakunida Elnora Moʻminova “Olima ayollar” uyushmasi hamda Roziya Nuriddinova “Ixtirochi ayollar” kengashining Fargʻona viloyati boʻlimi raisi vazifasiga tayinlandi.

Botir Madiyorov, “Xalq soʻzi”.