Foto: Xalq so‘zi

Oʻzbekiston Respublikasi Prezidentining tegishli qarori bilan tashkil etilayotgan Namangan toʻqimachilik sanoati instituti Fargʻona vodiysida ushbu soha uchun zamonaviy mutaxassislar tayyorlaydigan muassasaga aylanadi. Bu yerda oʻquv jarayoni 2023/2024 oʻquv yilidan boshlanadi va kredit-modul tizimiga asoslanadi.

Qarorda oliy va oʻrta maxsus taʼlim vazirligi, Prezident taʼlim muassasalari agentligi, “Oʻztoʻqimachiliksanoat” uyushmasi va “Oʻzbekiston paxta-toʻqimachilik klasterlari” uyushmasi toʻqimachilik sanoati rivojlangan xorijiy davlatlar oliy taʼlim tashkilotlari bilan hamkorlikda Institutning zamonaviy oʻquv dasturlarini yaratishi belgilab qoʻyilgan. Oʻz navbatida, 2024/2025 oʻquv yiliga qadar Institut huzurida toʻqimachilik texnoparki faoliyati ham yoʻlga qoʻyiladi.

2026-2027 oʻquv yiliga qadar yangi OTMning kamida 2 ta bakalavriat taʼlim yoʻnalishi va 3 ta magistratura mutaxassisligini xalqaro tan olingan tashkilotlar akkreditatsiyasidan oʻtkazish koʻzda tutilgan.

Maʼlumot uchun, yaqinda viloyatda Turon xalqaro universiteti ham oʻz faoliyatini boshlagan edi.

Qudratilla NAJMIDDINOV, “Xalq soʻzi”.