Фото: Халқ сўзи

Ўзбекистон Республикаси Президентининг тегишли қарори билан ташкил этилаётган Наманган тўқимачилик саноати институти Фарғона водийсида ушбу соҳа учун замонавий мутахассислар тайёрлайдиган муассасага айланади. Бу ерда ўқув жараёни 2023/2024 ўқув йилидан бошланади ва кредит-модуль тизимига асосланади.

Қарорда олий ва ўрта махсус таълим вазирлиги, Президент таълим муассасалари агентлиги, «Ўзтўқимачиликсаноат» уюшмаси ва «Ўзбекистон пахта-тўқимачилик кластерлари» уюшмаси тўқимачилик саноати ривожланган хорижий давлатлар олий таълим ташкилотлари билан ҳамкорликда Институтнинг замонавий ўқув дастурларини яратиши белгилаб қўйилган. Ўз навбатида, 2024/2025 ўқув йилига қадар Институт ҳузурида тўқимачилик технопарки фаолияти ҳам йўлга қўйилади.

2026-2027 ўқув йилига қадар янги ОТМнинг камида 2 та бакалавриат таълим йўналиши ва 3 та магистратура мутахассислигини халқаро тан олинган ташкилотлар аккредитациясидан ўтказиш кўзда тутилган.

Маълумот учун, яқинда вилоятда Турон халқаро университети ҳам ўз фаолиятини бошлаган эди.

Қудратилла НАЖМИДДИНОВ, «Халқ сўзи».