Otabek ISROILOV/“Xalq soʻzi”. Nurafshon shahrida “Maʼrifat va saxovat karvoni” orqali bir qancha tashkilot rahbarlari aholi bilan ochiq muloqot qilmoqda. Bu karvon mahallalar boʻylab yoʻlga chiqar ekan, ijtimoiy-maishiy muammolar oʻrganiladi, kam taʼminlangan oilalarga moddiy yordam koʻrsatiladi, yoshlarga kasb-hunar va taʼlim sohalari boʻyicha maslahatlar beriladi.

— Bu tadbirning asosiy maqsadi — inson qadri har narsadan ustunligini amalda koʻrsatish. Shu jihatdan har bir fuqaroni rozi qilish va ularning hayot sifatini yaxshilashga qaratilganiga mahallamiz misolida ham guvoh boʻlib turibmiz, — deydi Uchqun mahallasida yashovchi Lazokat Xoldorova.

“Maʼrifat va saxovat karvoni” tadbirlari doirasida Nurafshon shahridagi 22 ta mahallada istiqomat qiluvchi 539 ta ehtiyojmand oila holidan xabar olish koʻzlangan. Buning uchun 4 ta koʻmak guruhi tuzilgan boʻlib, ularga 108 nafar masʼul biriktirilgan. Mutasaddilar xonadonma-xonadon yurib, oilalarning ahvolidan xabar olmoqda, ularni qiynayotgan muammolarni oʻrganmoqda.

Kam taʼminlangan, ijtimoiy himoyaga muhtoj oilalarga birinchi tibbiy yordam toʻplamlari, dori-darmon va shaxsiy gigiyena vositalari, maktab oʻquvchilari uchun oʻquv qurollari, oʻzbek va jahon adabiyotining sara namunalaridan iborat kitoblar jamlamasi topshirilyapti.