Отабек ИСРОИЛОВ/«Халқ сўзи». Нурафшон шаҳрида «Маърифат ва саховат карвони» орқали бир қанча ташкилот раҳбарлари аҳоли билан очиқ мулоқот қилмоқда. Бу карвон маҳаллалар бўйлаб йўлга чиқар экан, ижтимоий-маиший муаммолар ўрганилади, кам таъминланган оилаларга моддий ёрдам кўрсатилади, ёшларга касб-ҳунар ва таълим соҳалари бўйича маслаҳатлар берилади.

— Бу тадбирнинг асосий мақсади — инсон қадри ҳар нарсадан устунлигини амалда кўрсатиш. Шу жиҳатдан ҳар бир фуқарони рози қилиш ва уларнинг ҳаёт сифатини яхшилашга қаратилганига маҳалламиз мисолида ҳам гувоҳ бўлиб турибмиз, — дейди Учқун маҳалласида яшовчи Лазокат Холдорова.

«Маърифат ва саховат карвони» тадбирлари доирасида Нурафшон шаҳридаги 22 та маҳаллада истиқомат қилувчи 539 та эҳтиёжманд оила ҳолидан хабар олиш кўзланган. Бунинг учун 4 та кўмак гуруҳи тузилган бўлиб, уларга 108 нафар масъул бириктирилган. Мутасаддилар хонадонма-хонадон юриб, оилаларнинг аҳволидан хабар олмоқда, уларни қийнаётган муаммоларни ўрганмоқда.

Кам таъминланган, ижтимоий ҳимояга муҳтож оилаларга биринчи тиббий ёрдам тўпламлари, дори-дармон ва шахсий гигиена воситалари, мактаб ўқувчилари учун ўқув қуроллари, ўзбек ва жаҳон адабиётининг сара намуналаридан иборат китоблар жамламаси топшириляпти.