Foto: Hasan Paydoyev, "Xalq so'zi"

Oliy Majlis Senatining yigirma beshinchi yalpi majlisida “Maktabgacha taʼlim va tarbiya toʻgʻrisida”gi Qonunni maʼqulladilar. Qonunni tayyorlashda Belarus, Gruziya, Qozogʻiston, Rossiya, Estoniya, Janubiy Koreya kabi mamlakatlarning qonunchilik tajribasi oʻrganilgan.

Qonun maktabgacha taʼlim va tarbiya sohasidagi munosabatlarni tartibga soladi.

Qonunda maktabgacha taʼlim va tarbiya sohasidagi davlat siyosatining asosiy yoʻnalishlari, shuningdek maktabgacha taʼlim va tarbiya olishga doir davlat kafolatlari belgilanmoqda.

Maktabgacha taʼlim va tarbiya sohasidagi davlat siyosatining roʻyobga chiqarilishini quyidagilardan tomonidan amalga oshirilishi belgilab qoʻyilmoqda: Vazirlar Mahkamasi, Vazirlar Mahkamasi huzuridagi Taʼlim sifatini nazorat qilish davlat inspeksiyasi, Maktabgacha taʼlim vazirligi, Sogʻliqni saqlash vazirligi, oʻz tasarrufida maktabgacha taʼlim tashkilotlari boʻlgan boshqa davlat va xoʻjalik boshqaruvi organlari, mahalliy davlat hokimiyati organlari.

Bundan tashqari, fuqarolarning, fuqarolar oʻzini oʻzi boshqarish organlarining, nodavlat notijorat tashkilotlarining hamda fuqarolik jamiyati boshqa institutlarining maktabgacha taʼlim va tarbiya sohasidagi tadbirlarda ishtirok etishi nazarda tutilmoqda.

Shuningdek, mazkur hujjatda maktabgacha boʻlgan yoshdagi bolalarni ijtimoiy himoya qilish belgilanmoqda, u maktabgacha boʻlgan yoshdagi bolalarga qarab turish va ularni taʼminlashni, maktabgacha taʼlim tashkilotlarida bolalarning ovqatlanishini tashkil etishni, maktabgacha taʼlim tashkilotida bolalarning sogʻligʻini saqlashni nazarda tutadi.

Shu bilan birga, Qonunda maktabgacha taʼlim tashkilotini boshqarish va uning faoliyatini tashkil etish tartibiga oid normalar nazarda tutilmoqda, jumladan, ular kim tomonidan boshqarilishi va ularning vakolatlari, maktabgacha taʼlim tizimining ilmiy-uslubiy taʼminoti va maktabgacha taʼlim tizimini ilmiy-uslubiy jihatdan taʼminlash vazifalari ochib berilmoqda.

Qonun qabul qilinishi taʼlim tizimida toʻplangan muammolarni bartaraf etish chora-tadbirlarini amalga oshirishga, taʼlim tizimini tubdan yaxshilash va taʼlimni xalqaro hamjamiyat bilan integratsiyalash, shuningdek, taʼlim sifatini yaxshilash uchunimkoniyatlar yaratishga xizmat qiladi.