Foto: “Xalq soʻzi”

Temur ESHBOYEV/«Xalq soʻzi». 2021-yildan buyon alohida davlat muassasasi sifatida faoliyatini davom ettirayotgan «Navoiy kon-metallurgiya kombinati jamgʻarmasi» bugun oʻz tasarrufida Navoiy, Samarqand, Jizzax viloyatlari va Toshkent shahrida 5 ta mehmonxona va ularning boʻlinmalari, 9187 kishiga moʻljallangan 39 ta yotoqxona, 631 ta xizmat xonadonlariga ega.

Mazkur turar-joylarda «NKMK» AJ, «Navoiy uran» DK, «NKMK jamgʻarmasi» ishchi-xizmatchilari istiqomat qilishib, davlat muassasasi tomonidan uy-joy kommunal xizmatlari koʻrsatiladi.

— Jamgʻarmamiz va uning hududiy boshqarmalari tomonidan 2023-yil yanvar — dekabr oyida ishchi xodimlar va ularning oila aʼzolarining yashash sharoitlarini yaxshilash maqsadida 944 nafariga yotoqxonalardan oʻrin joyi va xonalar ajratildi, — deydi muassasaning Uy joy masalalarini muvofiqlashtirish boʻlimi boshligʻi Z. Shamshiyeva. — Shuningdek, Jamgʻarma tasarrufidagi mehmonxonalar tomonidan 7793 nafar ishchi xodimlarga 4 milliard 398 million 600 ming soʻmlik mehmonxona xizmatlari koʻrsatildi.

Jamgʻarma mehnatkashlari 18-aprel – Oʻzbekiston Respublikasi Uy-joy kommunal xizmat koʻrsatish sohasi xodimlari kunini «Farhod» madaniyat saroyida nishonladilar. Ular sharafiga bayram dasturxoni yozilib, mehnat ilgʻorlari taqdirlandi. Jamgʻarma tasarrufidagi badiiy havaskorlik dastalarining konsert dasturi davraga fayz kiritdi.