Foto: Xalq so'zi

O‘zbekiston respublikasi Vazirlar Mahkamasining 2020 yil 14 dekabr kungi “2020-2025 yillarda kitobxonlik madaniyatini rivojlantirish va qo‘llab-quvvatlash milliy dasturini tasdiqlash to‘g‘risida”gi qarori asosida 2021 yildan buyon mamlakatimizda har yili aprel oyida “Kitobxonlik haftaligi” o‘tkazilib kelinmoqda.

Yaxshi an’ana tusini olgan mazkur haftalik doirasida Samarqand viloyat axborot-kutubxona markazida “Kitobsevar millat” shiori ostida qator tadbirlar bo‘lib o‘tmoqda.
 
Bundan ko‘zlangan maqsad aholi, ayniqsa, yoshlar o‘rtasida kitob o‘qishni keng targ‘ib etish va kitobxonlik madaniyatini yuksaltirishga qaratilgan.

- Mazkur haftalik aholi o‘rtasida kitobxonlik madaniyatini shakllantirish, yozuvchi-shoirlar bilan yaqindan muloqot qilish, asarlarning mazmun-mohiyatini tushuntirishda juda qo‘l kelmoqda, - deydi  O‘zbekiston Yozuvchilar uyushmasi viloyat bo‘limi rahbari Toshpo‘lat Tugalov. - Haftalik doirasida joylarda o‘tayotgan mana shunday tadbirlar davomida kitob yarmarkalarining ham tashkil etilayotgani barcha uchun foydali bo‘lyapti.

Haftalik doirasida viloyatning barcha shahar va tumanlaridagi axborot-kutubxona markazlari va umumta’lim maktablariga “Xalq so‘zi” gazetasi tahririyati tomonidan tuhfa etilgan kitoblar topshirildi.

15 aprelga qadar davom etadigan “Kitobxonlik haftaligi” doirasida kitob ko‘rgazmalari, ko‘rik-tanlovlar, ijodkorlar bilan uchrashuvlar, yangi adabiyotlar sharhi, badiiy va musiqiy kechalar, “Sevimli kutubxonamga kitob sovg‘a qilaman” aksiyalari ham o‘tkazilyapti.

Abdulaziz Yo‘ldoshev, "Xalq so‘zi".