Фото: Халқ сўзи

Ўзбекистон республикаси Вазирлар Маҳкамасининг 2020 йил 14 декабрь кунги “2020-2025 йилларда китобхонлик маданиятини ривожлантириш ва қўллаб-қувватлаш миллий дастурини тасдиқлаш тўғрисида”ги қарори асосида 2021 йилдан буён мамлакатимизда ҳар йили апрель ойида “Китобхонлик ҳафталиги” ўтказилиб келинмоқда.

Яхши анъана тусини олган мазкур ҳафталик доирасида Самарқанд вилоят ахборот-кутубхона марказида “Китобсевар миллат” шиори остида қатор тадбирлар бўлиб ўтмоқда.
 
Бундан кўзланган мақсад аҳоли, айниқса, ёшлар ўртасида китоб ўқишни кенг тарғиб этиш ва китобхонлик маданиятини юксалтиришга қаратилган.

- Мазкур ҳафталик аҳоли ўртасида китобхонлик маданиятини шакллантириш, ёзувчи-шоирлар билан яқиндан мулоқот қилиш, асарларнинг мазмун-моҳиятини тушунтиришда жуда қўл келмоқда, - дейди  Ўзбекистон Ёзувчилар уюшмаси вилоят бўлими раҳбари Тошпўлат Тугалов. - Ҳафталик доирасида жойларда ўтаётган мана шундай тадбирлар давомида китоб ярмаркаларининг ҳам ташкил этилаётгани барча учун фойдали бўляпти.

Ҳафталик доирасида вилоятнинг барча шаҳар ва туманларидаги ахборот-кутубхона марказлари ва умумтаълим мактабларига “Халқ сўзи” газетаси таҳририяти томонидан туҳфа этилган китоблар топширилди.

15 апрелга қадар давом этадиган “Китобхонлик ҳафталиги” доирасида китоб кўргазмалари, кўрик-танловлар, ижодкорлар билан учрашувлар, янги адабиётлар шарҳи, бадиий ва мусиқий кечалар, “Севимли кутубхонамга китоб совға қиламан” акциялари ҳам ўтказиляпти.

Абдулазиз Йўлдошев, "Халқ сўзи".