“Kichik Chimyon togʻi”da yongʻin sodir boʻldi
Ijtimoiy tarmoqlarda Boʻstonliq tumani “Burchimulla oʻrmon xoʻjaligi”ga qarashli “Kichik Chimyon togʻi”da yongʻin sodir boʻlgani haqidagi xabarlar tarqaldi. Mazkur holat yuzasidan Favqulodda vaziyatlar vazirligi maʼlumot berdi.
Unda aytilishicha, kecha, 10-iyun kuni soat 19:32 da Toshkent viloyati, Boʻstonliq tumani “Burchimulla oʻrmon xoʻjaligi”ga qarashli “Kichik Chimyon togʻi”da quruq oʻt va shox-shabbalar yonib ketgan. Ushbu holat yuzasidan Toshkent viloyati FVBga amaliy yordam zarurligi toʻgʻrisida murojaat kelib tushgan.
Murojaatga asosan, yongʻin-qutqaruv ekipajlari voqea joyiga soat 19:38 da yetib borib, soat 19:55 da yongʻin oʻrab olingan va soat 20:25 da toʻliq oʻchirilgan.
Vazirlik bergan maʼlumotlarga koʻra, yongʻin oqibatida dam olish maskanlari va aholi yashash xonadonlariga zarar yetmagan.
“Hozirda yongʻin sababi va zarari aniqlanmoqda. Holat oqibatida tan jarohati olganlar yoʻq” — deyiladi FVV xabarida.
Izohlar
Hozircha hech kim fikr bildirmagan. Balki Siz birinchilardan bo'larsiz?
Izoh qoldirish uchun tizimga kiring