Xiva shahrida YUNESKO hamda Oʻzbekiston Respublikasi Prezidenti Administratsiyasi huzuridagi Ommaviy axborot vositalari uchun kontent tayyorlash markazi hamkorligida mahalliy hokimliklar va davlat tashkilotlari matbuot kotiblari uchun ikki kunlik oʻquv-seminar trening oʻtkazildi. Axborot olish huquqi va strategik kommunikatsiya masalalariga bagʻishlangan mazkur trening matbuot kotiblarining kasbiy bilim va koʻnikmalarini oshirishga qaratildi.

— Seminar jarayonida fuqarolarning axborot olish huquqini taʼminlash, davlat idoralari faoliyatida shaffoflik va ochiqlik madaniyatini yuksaltirish masalalariga asosiy eʼtibor qaratildi, — deydi YUNESKOning xalqaro eksperti, professor Joan Barata. — Shuningdek, strategik kommunikatsiyada sunʼiy intellekt imkoniyatlaridan samarali foydalanish, raqamli xavfsizlikni taʼminlash hamda zamonaviy axborot xatarlariga qarshi kurashish boʻyicha atroflicha fikr almashildi.

Taʼkidlash joizki, ushbu oʻquv-seminar Oʻzbekistonning barqaror rivojlanish maqsadlari doirasida jamoatchilikning axborotdan foydalanish imkoniyatlarini kengaytirish, davlat idoralari va jamoatchilik oʻrtasida samarali muloqotni yoʻlga qoʻyish hamda institutsional salohiyatni mustahkamlashga xizmat qiladi.

Odilbek ODAMBOYEV, “Xalq soʻzi”.