Хива шаҳрида ЮНЕСКО ҳамда Ўзбекистон Республикаси Президенти Администрацияси ҳузуридаги Оммавий ахборот воситалари учун контент тайёрлаш маркази ҳамкорлигида маҳаллий ҳокимликлар ва давлат ташкилотлари матбуот котиблари учун икки кунлик ўқув-семинар тренинг ўтказилди. Ахборот олиш ҳуқуқи ва стратегик коммуникация масалаларига бағишланган мазкур тренинг матбуот котибларининг касбий билим ва кўникмаларини оширишга қаратилди.

— Семинар жараёнида фуқароларнинг ахборот олиш ҳуқуқини таъминлаш, давлат идоралари фаолиятида шаффофлик ва очиқлик маданиятини юксалтириш масалаларига асосий эътибор қаратилди, — дейди ЮНЕСКОнинг халқаро эксперти, профессор Жоан Барата. — Шунингдек, стратегик коммуникацияда сунъий интеллект имкониятларидан самарали фойдаланиш, рақамли хавфсизликни таъминлаш ҳамда замонавий ахборот хатарларига қарши курашиш бўйича атрофлича фикр алмашилди.

Таъкидлаш жоизки, ушбу ўқув-семинар Ўзбекистоннинг барқарор ривожланиш мақсадлари доирасида жамоатчиликнинг ахборотдан фойдаланиш имкониятларини кенгайтириш, давлат идоралари ва жамоатчилик ўртасида самарали мулоқотни йўлга қўйиш ҳамда институционал салоҳиятни мустаҳкамлашга хизмат қилади.

Одилбек ОДАМБОЕВ, «Халқ сўзи».