Foto: Illustrativ surat

Bu haqda “Oʻzgidromet” maʼlumotlarni eʼlon qildi. 

Ertaga faqat respublikaning sharqiy hududlarida beqaror ob-havo saqlanib turadi. Oʻzbekiston boʻyicha yogʻingarchilik kutilmaydi, faqat Fargʻona vodiysi viloyatlarida, shuningdek, togʻ oldi va togʻli hududlarda kechasi va kunning birinchi yarmida qor yogʻadi. Havo harorati kechasi 5-10^o sovuq, kunduzi 3^o sovuq-2^o iliq, respublikaning shimoliy hududlarida kechasi 13-15^o sovuq, baʼzi joylarda 20^o sovuqgacha, kunduzi 4-9^o sovuq atrofida boʻladi.

Soʻng ish haftasining oxirigacha Oʻzbekiston boʻyicha yogʻingarchiliksiz ob-havo boʻlishi kutilmoqda, faqat respublikaning janubi-sharqiy hududlarida, asosan togʻ oldi va togʻli hududlarda 7-8-dekabr kunlari baʼzi joylarda biroz qor yogʻadi. Havo harorati kechalari 3-8^o sovuqni, baʼzi joylarda 10^o sovuqgachani, kunduz kunlari 3^o sovuq-2^o iliqni, respublikaning shimoliy hududlarida kechasi 8-13^o sovuqni, baʼzi joylarda 15-20^o sovuqgachani, kunduz kunlari 2-7^o sovuqni tashkil etadi.

Respublika boʻyicha baʼzi joylarga tuman tushadi, yoʻllarda yaxmalak hodisalari kuzatiladi.

Oʻzgidromet issiqroq kiyinishni, shuningdek yoʻllarda ehtiyot choralarini koʻrishni tavsiya etadi.