Foto: Arxiv surat

Xorazm viloyatining Hazorasp tumanida 100 ta xonadonga moʻljallangan 5 ta koʻp qavatli yangi turar-joy oʻz egalariga topshirildi. Shu munosabat bilan oʻtkazilgan tadbirda soʻzga chiqqanlar aholining uy-joyga boʻlgan ehtiyojini taʼminlash mamlakatimizda inson qadrini ulugʻlash borasida olib borilayotgan ezgu ishlarning yana bir amaliy ifodasi ekanini taʼkidladilar.

— “Oʻz uying, oʻlan toʻshaging” degan iboraning maʼnosini uy-joyga muhtoj insonlar juda yaxshi anglaydi,— deydi hazorasplik Mohira Saʼdullayeva. – Biz ham ancha yillardan buyon uy-joy masalasida qiynalib kelayotgan edik. Tumanimizning yashash uchun qulay hisoblangan hududida barpo etilgan yangi uylardan 3 xonali kvartira bizning oilamizga ham nasib etdi. Yangi uy oilamizga yangi orzu-umidlar, baxt olib kirdi.

Hazorasp tumani aholisi soni bugungi kunda 200 ming nafardan oshdi. Uy-joyga boʻlgan ehtiyoj ortishi natijasida koʻp qavatli uy-joylar qurilishi koʻlami ham kengaymoqda. 2021-yilda tumanda 130 ta xonadonga, 2022-yilda 152 ta xonadonga moʻljallangan koʻp qavatli uylar qurilgan boʻlsa, joriy yilda 416 ta xonadonli 17 ta koʻp qavatli uylar foydalanishga topshiriladi.

                                                          Odilbek Odamboyev, “Xalq soʻzi”.