Oʻzbekistonning Guanchjoudagi Bosh konsulxonasi tomonidan  joriy yil 25-28-avgust kunlari boʻlib oʻtgan «31^st Guangzhou Fair» koʻrgazmasida Oʻzbekiston milliy stendi tashkil etildi va mamlakatimiz milliy mahsulotlari namoyish etildi.

Koʻrgazmada Oʻzbekistonda ishlab chiqarilgan va eksportga yoʻnaltirilayotgan 20 dan ortiq qayta ishlangan qishloq xoʻjaligi va qandolat mahsulotlari namoyish etildi, shuningdek mamlakatimizning sayyohlik va  eksport salohiyati taqdimoti oʻtkazildi.

Oʻzbekiston diplomatlari koʻrgazma davomida Guandun import mahsulotlari uyushmasi (GDIFA) bosh kotibining oʻrinbosari Vensi Tan bilan muzokara oʻtkazdilar.

Uchrashuv natijasida  tomonlar shu yil 21-23-sentyabr kunlari oʻtkaziladigan Food2China Expo and the Guangzhou International Food & Ingredient Fair koʻrgazmalarida ishtirok etadigan oʻzbek kompaniyalarining stendlari uchun chegirmalar taqdim etish, mamlakatimiz eksportchilari, hududiy ishlab chiqaruvchilari va Guandun, Fuszyan provinsiyalari importyorlari hamda savdo tarmoqlari oʻrtasida hamkorlik oʻrnatish, shuningdek, qayta ishlangan meva-sabzavot mahsulotlari eksportini yoʻlga qoʻyish toʻgʻrisida kelishuvga erishildi.

«31^st Guangzhou Fair» koʻrgazmasi 90 ming kv.m. maydonda tashkil etildi.  9 ta pavilyondan iborat kompleksda shaharsozlik, mahalliy shaharlarni targʻib qilish, shuningdek, qishloq xoʻjaligi va qishloq hududlarini rivojlantirish boʻyicha yangi texnologiyalar  namoyish etildi. Koʻrgazma, shuningdek, yangi oziq-ovqat va xalqaro yetkazish zanjirlari, texnologiya va uskunalar, keksalar sogʻligʻini saqlash sanoati va tibbiyot yoʻnalishlarini  ham qamrab oldi.