Botir MADIYOROV/“Xalq soʻzi”. Fargʻona viloyati koʻp qavatli uylar soni boʻyicha Toshkent shahridan keyingi oʻrinda turadi. Bu soha masʼullariga ulkan masʼuliyat yuklaydi.

Ayni paytda koʻp xonadonli uy-joy fondini saqlash, kuz-qish mavsumini betalafot oʻtkazish uchun sifatli taʼmirlash ishlariga alohida eʼtibor berilmoqda.

— Joriy yilda 52 ta uyning 27 ming kv.m tom qismi, 266 ta kirish yoʻlaklari, 69 ta uyning yertoʻla qismidagi muhandislik-kommunikatsiyalari, 59 ta uyning uy ichidagi muhandislik tarmoqlari, 98 ta uyning fasad qismini taʼmirlash ishlari bajarildi, — deydi Fargʻona viloyati qurilish va uy-joy kommunal xoʻjaligi bosh boshqarmasi boshligʻi oʻrinbosari Avazbek Madaminov. — Shuningdek, 112 ta temir eshik, 104 ta kodli qulflar, 150 kv.m framuga oynalari, 617 ta energiya tejamkor sensor lampalar oʻrnatildi.

Elektr taqsimlovchi shitlar toʻliq xatlovdan oʻtkazilib, manzilli roʻyxat asosida 1 ming 32 tasi toʻliq taʼmirdan chiqarildi. Boshqaruv servis kompaniyalari tomonidan koʻp kvartirali uylarda yashovchi fuqarolar mablagʻlaridan 168 ta uyning 350 ta qavatlararo elektr tarmogʻi xoʻjaligi obyektlari zamonaviy mezonlar asosida yangilandi.