Ботир МАДИЁРОВ/«Халқ сўзи». Фарғона вилояти кўп қаватли уйлар сони бўйича Тошкент шаҳридан кейинги ўринда туради. Бу соҳа масъулларига улкан масъулият юклайди.

Айни пайтда кўп хонадонли уй-жой фондини сақлаш, куз-қиш мавсумини беталафот ўтказиш учун сифатли таъмирлаш ишларига алоҳида эътибор берилмоқда.

— Жорий йилда 52 та уйнинг 27 минг кв.м том қисми, 266 та кириш йўлаклари, 69 та уйнинг ертўла қисмидаги муҳандислик-коммуникациялари, 59 та уйнинг уй ичидаги муҳандислик тармоқлари, 98 та уйнинг фасад қисмини таъмирлаш ишлари бажарилди, — дейди Фарғона вилояти қурилиш ва уй-жой коммунал хўжалиги бош бошқармаси бошлиғи ўринбосари Авазбек Мадаминов. — Шунингдек, 112 та темир эшик, 104 та кодли қулфлар, 150 кв.м фрамуга ойналари, 617 та энергия тежамкор сенсор лампалар ўрнатилди.

Электр тақсимловчи шитлар тўлиқ хатловдан ўтказилиб, манзилли рўйхат асосида 1 минг 32 таси тўлиқ таъмирдан чиқарилди. Бошқарув сервис компаниялари томонидан кўп квартирали уйларда яшовчи фуқаролар маблағларидан 168 та уйнинг 350 та қаватлараро электр тармоғи хўжалиги объектлари замонавий мезонлар асосида янгиланди.