Foto: “Xalq soʻzi”

Fargʻona musiqali drama teatrida sana munosabati bilan oʻtkazilgan maʼnaviy-maʼrifiy bayram tadbirida “Siz Konstitutsiyani bilasizmi?” mavzusida zakovat bahsi tashkil etildi.

Tadbirda “Fargʻona viloyatini xotin-qizlar oʻrtasida jinoyat va ishsizlikdan xoli hududga aylantirish dasturi” ijrosi yuzasidan Fargʻona, Margʻilon va Quvasoy shaharlari hamda Qoʻshtepa, Oltiariq, Quva, Toshloq, Yozyovon va Fargʻona tumanlarida amalga oshirilayotgan saʼy-harakatlar sarhisob etildi. Mazkur shahar-tumanlarda yashovchi alohida eʼtiborga muhtoj 300 nafar xotin-qiz hamda 100 nafar kasaba uyushmalari faollari ishtirokidagi tadbirda qatnashchilarning Qomusimiz boʻyicha bilimlari sinovdan oʻtkazildi.

Gʻoliblarga mahalliy va markaziy nashrlarga 2024-yil uchun bir yillik bepul obuna sertifikati hamda kitob jamlanmalari topshirildi. Shuningdek, tadbir qatnashchilari uchun viloyat musiqali drama teatri tomonidan sahnalashtirilgan “Zoʻrdan-zoʻr” spektakli namoyish etildi.

— Bugun ushbu qonun hujjatining hayotimizdagi oʻrnini yaqqol tasavvur etdim, — deydi Oltiariq tumani “Qapchugʻay” MFYda istiqomat qiluvchi Zulfiya Gʻofurova. — Oʻzbek va jahon adabiyoti durdonalarini farzandlarim oʻqiydi, xonadonimiz maʼrifat nuridan bahramand boʻladi. Demak, Konstitutsiya yurtimizdagi har bir oilaga, insonga ana shunday baxtni tuhfa etmoqda.

Botir MADIYOROV, “Xalq soʻzi”.