Фото: «Халқ сўзи»

Фарғона мусиқали драма театрида сана муносабати билан ўтказилган маънавий-маърифий байрам тадбирида “Сиз Конституцияни биласизми?” мавзусида заковат баҳси ташкил этилди.

Тадбирда “Фарғона вилоятини хотин-қизлар ўртасида жиноят ва ишсизликдан холи ҳудудга айлантириш дастури” ижроси юзасидан Фарғона, Марғилон ва Қувасой шаҳарлари ҳамда Қўштепа, Олтиариқ, Қува, Тошлоқ, Ёзёвон ва Фарғона туманларида амалга оширилаётган саъй-ҳаракатлар сарҳисоб этилди. Мазкур шаҳар-туманларда яшовчи алоҳида эътиборга муҳтож 300 нафар хотин-қиз ҳамда 100 нафар касаба уюшмалари фаоллари иштирокидаги тадбирда қатнашчиларнинг Қомусимиз бўйича билимлари синовдан ўтказилди.

Ғолибларга маҳаллий ва марказий нашрларга 2024-йил учун бир йиллик бепул обуна сертификати ҳамда китоб жамланмалари топширилди. Шунингдек, тадбир қатнашчилари учун вилоят мусиқали драма театри томонидан саҳналаштирилган “Зўрдан-зўр” спектакли намойиш этилди.

— Бугун ушбу қонун ҳужжатининг ҳаётимиздаги ўрнини яққол тасаввур этдим, — дейди Олтиариқ тумани “Қапчуғай” МФЙда истиқомат қилувчи Зулфия Ғофурова. — Ўзбек ва жаҳон адабиёти дурдоналарини фарзандларим ўқийди, хонадонимиз маърифат нуридан баҳраманд бўлади. Демак, Конституция юртимиздаги ҳар бир оилага, инсонга ана шундай бахтни туҳфа этмоқда.

Ботир МАДИЁРОВ, “Халқ сўзи”.