Foto: "Xalq so'zi"

Nodirjonning koʻzlari olazarak, kelgan-ketganlar orasidan otasini izlaydi. “Dadajon, meni olib keting!” deb kimni koʻrsa, qoʻlchalarini uzatadi. Koʻzlaridan oqayotgan munchoqdek yoshga qarab ezilib ketadi kishi...

Birdan u yugurib kelib, Xalqaro nogironlar kuni munosabati bilan bolalarga sovgʻa ulashayotgan harbiy yigit oyoqlarini quchoqladi: “Dadajon, meni olib keting!”

Yigit noqulay holatga tushib qoldi. Tarbiyachi keliboq bolani undan ajratib olar ekan, yigitning koʻzlaridan yosh oqayotganini sezdi.

— Bola-da, har koʻrgan erkakni otam deb oʻylaydi, — deydi Qarshi Muruvvat uyi direktori vazifasini bajaruvchi Nilufar Xayrullayeva. — Bu yerda 293 nafar aqliy va qoʻl-oyogʻida nuqsoni boʻlgan bolalar tarbiyalanadi. Jismoniy holatiga qarab ularni guruhlarga ajratganmiz. Baʼzilarining ota-onalari kelib turadi. Lekin kimni koʻrsa, otasiga oʻxshatayotgan bu bola  va u kabi bir necha tarbiyalanuvchilarimiz ota-onalari umuman xabar olmaydi. Tan olish kerak, davlatimiz bunday bolalarga mehr-muhabbat koʻrsatmoqda. Ayniqsa, Muruvvat uyidan  qadami uzilmaydigan, quchogʻini toʻldirib sovgʻalar koʻtarib kelayotgan homiy tashkilotlarga oʻz minnatdorligimizni  bildiramiz.

3-dekabr — Xalqaro nogironlar kuni munosabati bilan ushbu Muruvvat  uyida ham xayriya tadbiri oʻtkazildi. Unda partiyalar, harbiy qism va boshqa tashkilotlar vakillari sovgʻa-salomlar bilan kelib, bolajonlar dardini unutishga, murgʻak koʻngilariga quvonch olib kirishga muvaffaq boʻlishdi.

— Farzand dunyoga keldimi, demak, unda yashash huquqi bor, bu huquqni cheklashga hech kimning haqqi yoʻq, — deydi 1329-sonli harbiy qism komandirining tarbiyaviy-mafkuraviy ishlar boʻyicha oʻrinbosari, mayor Maʼruf Musayev. — Bugun Xalqaro nogironlar kuni munosabati bilan harbiy qismimiz zobit va askarlari tashabbusi bilan nogironligi bor oʻgʻil-qizlar holidan xabar olish uchun keldik. Biz ulashgan savgʻa-salomlar ular qalbiga ozgina boʻlsa-da, quvonch olib kirgan boʻlsa, bundan juda mamnunmiz. 

Bayram tadbirida Oʻzbekiston oliy harbiy aviatsiya bilim yurti yosh orkestri jamoasi tomonidan ijro etilgan musiqalar bolajonlar dilini yayratdi.

 Faxriddin Bozorov, “Xalq soʻzi”.