Фото: "Халқ сўзи"

Bu haqda ayni paytda AOKAda «Koʻp kvartirali uy-joylarni boshqarish tizimida olib borilayotgan ishlar, “Mening uyim” billing tizimi va boshqa masalalar ” yuzasidan boʻlib oʻtayotgan matbuot anjumanida Uy-joy kommunal xizmat koʻrsatish vaziri Sherzod Hidoyatov aytib oʻtdi.

Bugungi kunda respublika boʻyicha jami 39 265 ta koʻp kvartirali uy mavjud boʻlib, shundan 22 mingdan ziyod koʻp kvartirali uy 3 753 ta shirkat hamda 324 ta boshqaruvchi tashkilot tomonidan boshqariladi. Shuningdek, 889 ta uy bevosita joylarning mulkdorlari tomonidan boshqarib kelinmoqda. Koʻp kvartirali uylarning 876 tasi boshqa tashkilotlar balansida, qolgan 1 407 tasi boshqaruvsiz uylardir.

Oʻzbekiston Respublikasi Prezidentining «Koʻp kvartirali uy-joylarni boshqarish tizimini yanada takomillashtirish toʻgʻrisida»gi qaroriga asosan, eksperiment tariqasida 2021-yilda hududlarda 15 ta boshqaruvchi tashkilot “ochiq tanlov” yoʻli bilan tanlandi va faoliyati toʻliq yoʻlga qoʻyildi.

Bunda 1 227 ta koʻp kvartirali uy-joylarni boshqarish uchun tegishli shartnomalar tuzildi.

Qisqa vaqt ichida, respublika boʻyicha boshqaruv kompaniyalari kredit qarzdorligi 43 milliard soʻmdan 22 milliard soʻmgacha qisqardi, 500 nafarga yaqin ish oʻrinlari yaratildi.