Фото: Халқ сўзи

Бу ҳақда айни пайтда АОКАда «Кўп квартирали уй-жойларни бошқариш тизимида олиб борилаётган ишлар, «Менинг уйим» биллинг тизими ва бошқа масалалар ” юзасидан бўлиб ўтаётган матбуот анжуманида Уй-жой коммунал хизмат кўрсатиш вазири Шерзод Ҳидоятов айтиб ўтди.

Бугунги кунда республика бўйича жами 39 265 та кўп квартирали уй мавжуд бўлиб, шундан 22 мингдан зиёд кўп квартирали уй 3 753 та ширкат ҳамда 324 та бошқарувчи ташкилот томонидан бошқарилади. Шунингдек, 889 та уй бевосита жойларнинг мулкдорлари томонидан бошқариб келинмоқда. Кўп квартирали уйларнинг 876 таси бошқа ташкилотлар балансида, қолган 1 407 таси бошқарувсиз уйлардир.

Ўзбекистон Республикаси Президентининг «Кўп квартирали уй-жойларни бошқариш тизимини янада такомиллаштириш тўғрисида»ги қарорига асосан, эксперимент тариқасида 2021 йилда ҳудудларда 15 та бошқарувчи ташкилот «очиқ танлов» йўли билан танланди ва фаолияти тўлиқ йўлга қўйилди.

Бунда 1 227 та кўп квартирали уй-жойларни бошқариш учун тегишли шартномалар тузилди.

Қисқа вақт ичида, республика бўйича бошқарув компаниялари кредит қарздорлиги 43 миллиард сўмдан 22 миллиард сўмгача қисқарди, 500 нафарга яқин иш ўринлари яратилди.