Farhod ESONOV/“Xalq soʻzi”. Yurtimizda istiqlol shukuhi kezib yurgan shu kunlarda Surxondaryo viloyati Boysun tumanidagi Bibishirin mahallasida 9-sonli oilaviy poliklinikaning ikki qavatli zamonaviy yangi binosi foydalanishga topshirildi.

Tantanali ochilish marosimida tuman hokimi boshchiligidagi nuroniylar, mehnat faxriylari va keng jamoatchilik ishtirok etdi.

— Qishloq vrachlik punkti sifatida 1996-yilda qurilgan tibbiyot muassasamiz 50 qatnovga moʻljallangan edi, — deydi Bahrom ota Bozorov. — Shuncha yil mobaynida aholi soni koʻpaymoqda. Qolaversa, zamonaviy tibbiy anjomlarga ham ehtiyoj ortmoqda. Yangi binomiz 100 qatnovli, barcha anjomlar bilan taʼminlangan.

Bugungi kunda tumanda 265 oʻringa moʻljallangan 1 ta tuman markaziy shifoxonasi, 1 ta koʻp tarmoqli markaziy poliklinika va uning 2 ta hududiy boʻlimi, 4 ta oilaviy poliklinika, 6 ta oilaviy shifokorlik punkti faoliyat koʻrsatib kelmoqda.

Tadbirda tuman hokimi Bahodir Shukurov ishtirok etib, tadbir ishtirokchilarini Mamlakatimiz mustaqilligining 33 yillik bayrami hamda yangi bino topshirilishi munosabati bilan qutladi.