Фарҳод ЭСОНОВ/«Халқ сўзи». Юртимизда истиқлол шукуҳи кезиб юрган шу кунларда Сурхондарё вилояти Бойсун туманидаги Бибиширин маҳалласида 9-сонли оилавий поликлиниканинг икки қаватли замонавий янги биноси фойдаланишга топширилди.

Тантанали очилиш маросимида туман ҳокими бошчилигидаги нуронийлар, меҳнат фахрийлари ва кенг жамоатчилик иштирок этди.

— Қишлоқ врачлик пункти сифатида 1996 йилда қурилган тиббиёт муассасамиз 50 қатновга мўлжалланган эди, — дейди Баҳром ота Бозоров. — Шунча йил мобайнида аҳоли сони кўпаймоқда. Қолаверса, замонавий тиббий анжомларга ҳам эҳтиёж ортмоқда. Янги биномиз 100 қатновли, барча анжомлар билан таъминланган.

Бугунги кунда туманда 265 ўринга мўлжалланган 1 та туман марказий шифохонаси, 1 та кўп тармоқли марказий поликлиника ва унинг 2 та ҳудудий бўлими, 4 та оилавий поликлиника, 6 та оилавий шифокорлик пункти фаолият кўрсатиб келмоқда.

Тадбирда туман ҳокими Баҳодир Шукуров иштирок этиб, тадбир иштирокчиларини Мамлакатимиз мустақиллигининг 33 йиллик байрами ҳамда янги бино топширилиши муносабати билан қутлади.