Foto: Xalq so‘zi

Andijon viloyatida milliy adabiyotimizning yirik vakillaridan biri, benazir shoir, jahon ilm-fani hamda madaniyati rivojiga munosib hissa qoʻshgan shoh va sarkarda Zahiriddin Muhammad Boburning 540-yillik tavalludiga bagʻishlangan tadbirlar boʻlib oʻtdi.

Viloyat markazidagi Bobur maydonida boshlangan anjumanda respublikamizdan tashqari Hindiston, Afgʻoniston, Qozogʻicton, Qirgʻiziston va AQSHdan tashrif buyurgan boburshunos olimlar, keng jamoatchilik vakillari hamda talaba-yoshlar ishtirok etdilar. Ular buyuk bobomizga hurmat ifodasi sifatida uning haykali poyiga guldastalar qoʻyishdi.

— Shoirning dilbar gʻazallari, purmaʼno ruboiy va masnaviylari, butun dunyoga maʼlumu mashhur “Boburnoma”si, musiqa ilmiga doir durdona asarlari uning naqadar serqirra inson boʻlganidan dalolat beradi, — deydi Oʻzbekiston Yozuvchilar uyushmasi aʼzosi Sardor Sirojiddin. — Xususan, “Boburnoma” tarixiy-memuar asari jahonning 70 dan ortiq mamlakati muzeylaridan joy olib, oʻttizdan ortiq tilga tarjima qilingan.

Bobur nomidagi xalqaro jamoat fondida boʻlib oʻtgan “Zahiriddin Muhammad Bobur ijodiy merosining bashariyat maʼnaviy-maʼrifiy taraqqiyotidagi oʻrni” xalqaro konferensiyasida boburshunos olimlarning soʻnggi yillarda olib borgan ilmiy ishlari va toʻplamlari taqdimotlari boʻlib oʻtdi.

Saminjon HUSANOV, “Xalq soʻzi”.