Foto: Reuters

Isroilning umumiy xavfsizlik xizmati (Shin Bet) vakillari Isroil va Falastinning HAMAS harakati oʻrtasidagi mojaro avj olishidan oldin, Bosh vazir Binyamin Netanyaxuni bir necha oy davomida uning ichki siyosati sabab boʻlgan siyosiy beqarorlik mamlakatdagi vaziyatni zaiflashtirayotgani haqida ogohlantirgan. Ammo hukumat rahbari isroillik generallarning bayonotlarini eʼtiborsiz qoldirgan. Bu haqda “The New York Times” xabar bermoqda.

Nashrning taʼkidlashicha, Yaqin Sharqdagi eng qudratli harbiy kuch nafaqat hujum koʻlamini toʻliq eʼtiborsiz qoldirdi, balki oʻzining razvedka maʼlumotlarini toʻplash borasidagi saʼy-harakatlarida, asosan, takabburlik va HAMASni yashirin tahdid, degan notoʻgʻri taxmin tufayli muvaffaqiyatsizlikka uchradi.

Maqolada, shuningdek, Isroil parlamenti shu yilning 24-iyul kuni ommaviy noroziliklarga sabab boʻlgan sud-huquq islohotini maʼqullagan kuni ikki yuqori martabali general qonunchilarni davlatning harbiy ahvoli haqida shoshilinch ogohlantirishlarni yetkazishga chaqirgani taʼkidlangan.

Isroil Harbiy razvedka boshqarmasi boshligʻi Aaron Xaliv maxfiy hisobotlarni taqdim etib, ichki tartibsizliklar Isroil mudofaasini zaiflashtirayotganini iddao qilgan. Hujjatlardan birida Eron, HAMAS, Suriya, “Hizbulloh” va “Islomiy jihod” yetakchilari zarba berish vaqti kelganiga ishonchi komil ekani koʻrsatilgan.

Qayd etilishicha, Xalivning brifingini tinglash uchun parlamentdan faqat ikki nafar deputat kelgan. Shu bilan birga, Netanyaxu bu ogohlantirishlarni unga yetkazmoqchi boʻlgan qurolli kuchlar bosh shtab boshligʻi, general Gersi Xalevi bilan uchrashuvdan bosh tortgan.